Lokalavisene har dekt lokalvalet og valkampen svært tett, og gjort ein formidabel jobb for veljarane. Dette er ein styrke for lokaldemokratiet. For avisene betalte det seg i form av svært høg trafikk på nett, spesielt på valkvelden.
I tillegg til at lokalavisene lagar mykje god og grundig journalistikk, er det stadig fleire som tek i bruk nye verktøy for å nå ut. Nokre få av mange døme: Vest-Telemark blad viste fram 500 listekandidatar i ei interaktive oversikt. Avisa Hordaland hadde videoserie med dei yngste kandidatane. Hallingdølen inviterte ordførarkandidatane i podkast-studio. Nordre arrangerte direktesendt valdebatt. Fjuken hadde livesending på valkvelden.
– Kvar einaste valvake vi var ute på, 12 i 3 kommunar, hadde Fjuken-TV på storskjerm. Ingen fylgde riksmedia, fortel redaktør Hans Erik Kjosbakken i Fjuken, som skildrar sendinga slik:
Ei fem timar og 40 minutt lang direktesending, med ekspertkommentator på plass i studio, utegåande reporterar og etter kvart eit VM i tomprat. Her hadde vi på det meste 500 sjåarar direkte, og 150 var med oss til the bitter end. Opptaket er nå oppe i ca. 5.000 avspelingar. Tal som for oss er utrulege.
Journalist Jon Audun Haukø i Ytringen kan fortelje om ein formidabel auke i trafikken på nett undervegs i valkampen.
– Vi har klart å auke frå rundt 5.000 sidevisningar per dag til å liggje over 10.000 nesten kvar dag no. Vi fekk rekordar måndag og tysdag, med ca 22.500 og 27.000, fortel Haukø, som trur valgdekninga er den viktigaste årsaka.
Alle lokalavisene vi i LLA-sekretariatet har vore i kontakt med dei siste dagane, melder om besøksrekordar på nett i samband med valet. Vår oversikt er ikkje uttømmande, men vi tør påstå at dette gjeld eit stort fleirtal av lokalavisene.