Før valet har Firdaposten og avisa Hordaland løfta fram dei yngste kandidatane på listene. Vi har spurt kva spørsmål dei var ekstra nøgde med at dei stilte.
Det vanskelegaste med å vera politikar?
– Me likte spørsmålet som var om politikarane faktisk får gjort ein forskjell som lokalpolitikar, eller kva det kjekkaste/vanskelegaste med å vera lokalpolitikar er. Det var særleg på desse spørsmåla at me fekk konkrete, gode svar tilbake. Og supplert med dilemma-challenge for å få litt lettbeint futt i videoane, svarar Tonje Oliversen i avisa Hordaland.
Tonje Oliversen og Marit Folkedal Lussand har laga videoserien Unge til unge om politikk. I tillegg til spørsmål om dei viktigaste lokalsakene og kvifor unge bør stemma, hadde dei altså dilemma-spørsmål som «ikkje kunna telja eller ikkje kunna lesa» eller «fint hus med stygg utsikt eller stygt hus med fin utsikt».
Kandidatane vart også utfordra til å forklara eit tørt politisk ord medan dei åt chili, lime eller jalapeño.
Korleis er det å vera yngst?
I Firdaposten har avisa sine to sommarvikarar Dina Bovim og Andreas Sørland laga podkastserien «Ungdomsalibiet».
– Det var interessant å få vita korleis det er å kome inn som yngst, korleis dei har blitt tatt i mot i sitt lokallag, og korleis dei trivst med å vera yngst, om dei føler at dei sit i eit gubbevelde eller ikkje. Eg vart overraska over variasjonen i svar. Dei hadde ulike erfaringar, og det var spennande å få fram, seier Dina Bovim.
- Favorittserie?
- Kven ville du hatt med deg på ei øde øy?
- Draumeyrke?
- Om du var diktator i kommunen for ein dag, kva ville du gjort?
Dina føler at dei gjennom serien klarte å få fram at ein ikkje treng å vera ein spesiell type for å vera politisk aktiv.
– Nokon av dei unge på listene er broilerar, nokon engasjerer seg fordi dei ønskjer ei endring, andre har berre tenkt at det kunne vera spennande, seier ho.