Både produksjonstilskotet til lokalavisene, innovasjonstøtta og løvyinga til kompetansetiltak blir ført vidare om lag på samme måte som no. Det kjem fram i forslaget til statsbudsjettet for 2026 som regjeringa la fram i dag.
LLAs generalsekretær Tomas Bruvik seier dette om budsjettet:
– I urolege tider, der redaktørstyrte medier i mange land er under press, er det heilt avgjerande for vårt eige lokaldemokrati å ha frie og uavhengige lokalaviser. Det er lokalavisene som bryr seg om lokal politikk, kultur, næringsliv og folk sin kvardag. I ei tid der dei store internasjonale teknologi-gigantane tar over avisenes annonseinntekter, er det særleg viktig at våre eigne politikarar stiller opp med litt av fellesskapets midlar for å bidra til mediemangfaldet i Norge. Det er vi glade for at våre politikarar gjer. Samstundes meiner vi at pressestøtta treng eit løft. Det skal vi målbera i arbeidet med dei fireårige styringssignala som blir lagt fram for Stortinget neste år.
Regjeringa foreslår at nesten 456 millionar kroner blir brukt til direkte produksjonsstøtte til avisene neste år. Innovasjonsstøtta, som LLA i si tid jobba hardt for å få på plass, blir på nesten 25 millionar kroner. Innovasjonspotten skal fremja redaksjonell, innhaldsretta innovasjon og utvikling i små, lokale nyhets- og aktualitetsmedier. Samiske aviser får rundt 46 millionar kroner. Støtta til etterutdanning er også inflasjonsjustert.
Regjeringa doblar løyvinga til Samarbeidsdesken i Bergen, frå éin til to millionar kroner i året. Dette er ei stor satsing på undersøkjande journalistikk, research og kompetanse som over 100 lokalaviser, Landslaget for lokalaviser (LLA), Senter for undersøkende journalistikk (SUJO) og NRK står bak. Satsinga gjer at Samarbeidsdesken kan hjelpe lokalavisene med å lage god, grundig og lokal journalistikk.
– Vi er svært glade for regjeringa aukar tilskotet til Samarbeidsdesken. Det vitnar om ei forståing for at lokalavisene gjer ein svært viktig jobb for folk, og at lokalavisene må ha gode verktøy for å lage god journalistikk. Auken til Samarbeidsdesken betyr mykje i arbeidet for å gjere desken enda betre, seier LLAs generalsekretær Tomas Bruvik. Han gler seg også over ei styrking til andre medietiltak, blant anna Institutt for Journalistikk, Senter for undersøkende journalistikk og eit nytt senter for kildebevissthet.
LLA er organisasjonen for over 125 lokalaviser landet rundt.
For kommentarar og meir informasjon:
Tomas Bruvik, generalsekretær i LLA, mobil 411 08 523, tomas()lla.no