Populært å koma i form med Sunnhordland

“Eg hamna i elitepulja. Kan de tenkja dykk for ein galskap. Eg sprang som ein av dei første ut får start og vart driven med i eit dragsug som førte til at leggene krølla seg mest. Eller motsett, stivna som stokkar og verkte som om dei hadde blitt prylte. Eg måtte gå. Eg gjekk og gjekk og det gav seg litt. Og då eg prøvde å springa litt att var det rett før det svartna.”

Trim er noko mange aviser satsar stort på. Lokalavisa Sunnhordland var tidleg ute med lesartur/maratontur til Medoc i Frankrike for to år sidan, med kring 50 påmelde, to av dei frå redaksjonen: Jarle Kaldråstøyl og Lars Mæland, som begge sprang maratondistansen på 42.195 meter. I fjor chartra Sunnhordland fly frå Stord til København og maraton der, med 45 påmelde, blant dei Jarle/Lars som begge sprang maraton.

Helga 14.-16. oktober var det 47 med på lesarturen/maratonturen til Amsterdam, seks var heiagjeng, 23 sprang maraton (blant dei Jarle og Lars), 17 sprang halvmaraton (blant dei debutant Atle Hansen), ein sprang åtte km. Eldste deltakar var 72 år, yngste 21 år.

Avisa har fått utruleg mange positive tilbakemeldingar på eit sprekt opplegg. Maratonturane skjer i samarbeid med Rogaland Marathon Tour, og interessa for Amsterdam-turen var så stor at éi annonse i eiga avis var nok til å fylla alle plassane me hadde.

Undervegs har avisa hatt treningstips i papiravisa, og blogg på sunnhordland.no, begge med god respons. Ansvarleg redaktør Magne Kydland sprang også halvmaraton i Amsterdam (debutant).

Sitatet øvst er henta frå journalist og halvmaratondebutant Atle Hansen sin blogg på sunnhordland.no