Både produksjonstilskotet, innovasjonstøtta og støtte til kompetansetiltak blir omtrent inflasjonsjustert.
Det er ekstra gledeleg at Landslaget for lokalaviser (LLA) får 1 million kroner kroner til Samarbeidsdesken i Bergen. Dette er ei stor satsing på undersøkjande journalistikk, research og kompetanse som LLA, Senter for undersøkende journalistikk (SUJO) og NRK står bak. Satsinga blei i si tid initiert av Vest-Telemark blad, ei rekke lokalaviser og LLA – og får no altså på plass ei litt tryggare grunnfinansiering som gjer at Samarbeidsdesken framleis kan hjelpa lokalavisene med å lage god og grundig lokaljournalistikk.
Det var derfor god stemning i Bergen måndag, då statsråd Lubna Jaffery (Ap) møtte LLAs generalsekretær Tomas Bruvik under Kultur- og likestillingsdepartementets pressekonferanse på Kode kunstmuseum (bildet over). Her la Jaffery fram kulturbudsjettet for neste år – der altså Samarbeidsdesken nettopp i Bergen er tilgodesett med støtte til vidare drift.
Andre som også kan smile, er LLA og NRKs medarbeidarar på Samarbeidsdesken: Laila Borge (t.v.), Maja M. Aarbakke, Christian Lura og Øivind Skjervheim.
Regjeringa føreslår at totalt 440 millionar kroner blir brukt til direkte produksjonsstøtte til avisene neste år. Innovasjonsstøtta, som LLA i si tid jobba hardt for å få på plass, blir på nesten 24 millionar kroner. Innovasjonspotten skal fremme redaksjonell, innhaldsretta innovasjon og utvikling i små, lokale nyhets- og aktualitetsmedier. Også distribusjonsstøtta til avisene landet rundt er sikra vidare finansiering.
Samiske aviser får rundt 44 millionar kroner. Støtta til etterutdanning er også inflasjonsjustert.
LLAs styreleiar Øystein Øygarden og generalsekretær Tomas Bruvik kommenterer statsbudsjettet slik:
– Lokalavisene må kvar dag kjempa for å halde på lesar- og annonseinntektene. Det viktigaste avisene våre gjer er å lage lokalt og truverdig innhald som folk synest er interessant og som styrkar lokaldemokratiet. All ære til dei mange små avisene landet rundt som gjer ein god jobb for levande lokalsamfunn, seier Øystein Øygarden og Tomas Bruvik.
LLAs styreleiar og generalsekretær er svært nøgde med at også regjeringa anerkjenner det arbeidet som LLA, SUJO og NRK gjer med Samarbeidsdesken:
– Dette inspirerer oss i LLA og lokalavisene til å satse enda meir på kvalitetsjournalistikk, seier Øygarden og Bruvik.
Frå før av har Samarbeidsdesken fått innovasjonsmidlar gjennom Medietilsynet. I tillegg støtter Stiftelsen Fritt Ord LLAs arbeid med samarbeidande journalistikk.
LLA er organisasjonen for rundt 120 lokalaviser landet rundt.
For kommentarar og meir informasjon:
Øystein Øygarden, styreleiar i LLA og redaktør i Vest-Telemark blad, mobil 958 93 437, oystein.oygarden@vtb.no
Tomas Bruvik, generalsekretær i LLA, mobil 411 08 523, tomas@lla.no
LLAs styreleiar Øystein Øygarden (til høgre) og generalsekretær Tomas Bruvik.
LLAs generalsekretær Tomas Bruvik i samtale med blant anna statssekretær Erlend Kaldestad Hanstveit (Ap) før dagens framlegging av kulturbudsjettet.
Bildet frå Samarbeidsdesken i Bergen er tatt av Regine Skjærpe Olsen-Hagen i Senter for undersøkende journalistikk (SUJO). Bildene frå pressekonferansen på Kode kunstmuseum er tatt av LLAs Laila Borge, og bildet av LLAs styreleiar og generalsekretær er tatt av LLAs Geir K. Hus.