Avisa Hordaland har hatt ekstra fokus på marknaden for ledige stillingar i seinare tid.
Der er stillingsannonsane i papiravisa på ingen måte eit «døande» produkt.
Den klart største delen av inntektene på stilling kjem frå papirannonsar, men dei aller fleste vel også å vera med i den digitale stillingskarusellen. Hordaland har halde prisane på papir på same nivå som tidlegare, då dei ser at marknaden er villig til å betala for gode annonsar også på papir i deira område.
Dei har auka prisen på den digitale karusellen med omlag 70% utan at dette har ført til at færre nyttar denne. Trass koronatidene auka dei salet opp mot 35% på denne type annonsering.
Trenden held fram også i 2022 så langt.
– Dette er vel den kategorien annonse som syner best utvilking i ein elles litt treig marknad, seier sals- og marknadssjef Terje Øye.
Inntektene på stillingsannonsering hjå oss er såleis veldig mykje betre enn for annonsar generelt. På den totale annonseomsetnaden utgjer stilling ledig opp mot 15% av totalen.
– Annonsering på stilling følgjer nok mykje utviklinga i marknaden generelt, men me meiner at ekstra fokus på å «selja opp» produktet, med fokus på at det er lurt å bruka litt ekstra kroner på å få tak i fleire og betre kandidatar til stillinga, er verdt pengane for kunden. Dei skal betala løn til ein nytilsett i lengre tid, og då er det vel anvende pengar å bruka nokre 1000-lappar ekstra på annonseringa. I dagens marknad er det slik for gode fagfolk at dei oftast er i jobb allereie, og må freistast til å byta arbeidsgjevar, dei er oftast ikkje aktive jobbsøkjarar før dei ser gode alternativ i avisa. Desse treff ein klart best gjennom papiravisa som «alle» les, iallfall i vårt område. Eit enkelt grep dette, som har slege godt ut på omsetnaden vår, konkluderer Øye.