Gjennom året har lokalavisa vore lim og lupe og dekka oppturar, nedturar og store og små hendingar. 1. januar publiserte Synne Grimen Hammervoll i Nordhordland eit tilbakeblikk på året som hadde gått. Då hadde ho brukt rundt ein halv arbeidsdag på å finne fram saker og skrive ein tekst som er fylt med lenker og mange bilete.
Heile årskavalkaden til Nordhordland kan du lese her (open).
– Utover sakene eg tek på hugs, trur eg eg pleier å søke på taggar, ord og begrep. Og så sjekkar eg forsidene våre gjennom året, fortel ho, og legg til at ho og har brukt oversikta over best leste saker.
I 2023 fann ho ut at det var næringsliv og menneske som gjekk mest att i sakene i Nordhordland.
«Det er få ting som er så spennande som teikna på at det skjer noko nytt i nærområdet. Som tilflyttarar, nye satsingar og nye butikkar. Utanom hendingar var det nettopp saka om ein nykommar i Amfi Knarvik som vekte størst interesse hjå lesarane til NH i 2023,» skreiv ho i saka, og gav ei oversikt over butikkar som har flytta inn og ut av senteret.